सहकारीमा सुधार आवश्यक छ : उपराष्ट्रपति

काठमाडौं, १८ भदौ - उपराष्ट्रपति परमानन्द झाले सहकारीमा सुधार आवश्यक रहेको बताएका छन् । सोमबार एसिया प्यासिफिक क्षेत्रमा सहकारीको कार्यदिशा र विकाससम्बन्धी अन्तर्राष्ट्रिय सम्मेलनको उद्घाटन गर्दै झाले सहकारीको विकासका लागि यसले दिने सेवाको स्तरमा समेत सुधार गर्न सुझाव दिए ।

विपन्न जनतालाई  माथि उठाउने माध्यमका रूपमा सहकारीलाई सरकारले प्राथमिकता दिएको झाले बताए । खुला बजार अर्थतन्त्रको अवधारणाअनुसार सहकारीलाई पनि अगाडि बढाउन तीनखम्बे नीति लिएको उनको भनाइ थियो ।

कार्यक्रममा बोल्दै सहकारी तथा गरिबी निवारणमन्त्री एकनाथ ढकालले सहकारीमा सुधारका लागि सरकारले सहकारीसम्बन्धी नीति तथा कानुनमा सुधार गर्न लागेको बताए ।

पूर्व उपप्रधानमन्त्री भरतमोहन अधिकारीले दिगो आर्थिक विकासका लागि सरकारले सहकारीलाई आर्थिक विकासको एक खम्बाका रूपमा स्वीकार गरेको बताए । गरिबी न्यूनीकरण, रोजगारी सिर्जना, स्रोतको न्यायोचित वितरण र लोकतन्त्रको विकासका लागि सहकारी उपयुक्त माध्यम भएको बताउँदै ठूला आर्थिक संकटमा पनि सहकारी अर्थतन्त्र निर्वाधरूपमा अगाडि बढेको उनको दाबी थियो ।

अन्तर्राष्ट्रिय सहकारी सञ्जाल (एसिया प्यासिफिक)का क्षेत्रीय निर्देशक डा. चान हो चायले नयाँ पुस्तालाई सहकारीसम्बन्धी शिक्षा दिई यसमा सक्रिय सहभागी गराई सहकारीमा आधारित उद्यमशीलताको विकास गर्न सुझाव दिए  ।

दुई दिनसम्म चल्ने सम्मेलनमा अन्तर्राष्ट्रिय सहकारी सञ्जाल (एसिया प्यासिफिक)का प्रतिनिध, भारत, श्रीलंका, मलेसियाका साथै नेपालका सहकारीकर्मी गरी करिब १ सय जनाको सहभागिता छ ।

अन्तर्राष्ट्रिय सहकारी वर्ष २०१२ को उपलक्ष्यमा सहकारी तथा गरिबी निवारण मन्त्रालय र राष्ट्रिय सहकारी संघले संयुक्त रूपमा सम्मेलन आयोजन गरेको हो । सम्मेलनमा सहकारी व्यवसायलाई यस क्षेत्रमा गरिएको प्रवद्र्धन, सरोकारवाला पक्षबीच सम्बन्ध विस्तार,  गरिबी न्यूनीकरण, रोजगारी सिर्जना, सामाजिक एकतामा पु¥याएको योगदानबारेमा अनुभव आदान–प्रदान गरिने बताइएको छ ।