एक महिनादेखि सहकारी दर्ता ठप्प
काठमाडौं, ८ जेठ- एक महिनादेखि देशभर नयाँ सहकारी दर्ता ठप्प भएको छ । सहकारी विभागमा रजिस्ट्रार रिक्त हुँदा विभागअन्तर्गतका ३८ वटै डिभिजन कार्यालयमा नयाँ संस्था दर्ता हुन सकेको छैन ।“सहकारी ऐन–२०४८ ले रजिस्ट्रारलाई संस्था दर्ता गर्ने अधिकार दिएकाले एक महिनायता नयाँ संस्था दर्ता भएको छैन,” विभागका निमित्त रजिस्ट्रार उपेन्द्र ढुंगानाले भने ।
ऐनले सम्पूर्ण अधिकार रजिस्ट्रारमा निहित गरेकाले विभागका काम प्रायः ठप्प छन् । रजिस्ट्रारले अधिकार प्रत्यायोजन गरेपछि मात्र डिभिजन सहकारी कार्यालयका प्रमुखले संस्था दर्ता गर्न सक्ने कानुनी व्यवस्था छ । उपरजिस्ट्रार ढुंगानालाई निमित्त रजिस्ट्रारको जिम्मेवारी दिइए पनि संस्था दर्तालगायतका निर्णय गर्ने अधिकार नभएकाले विभागको दैनिक कार्य मात्र सञ्चालन भइरहेको छ ।
तत्कालीन कृषि तथा सहकारी मन्त्रालयले सहसचिव गेहनाथ भण्डारीलाई रजिस्ट्रारमा नियुक्ति गर्ने तयारी गरेको थियो । तर, वैशाख अन्तिम साता मन्त्रिपरिषद्ले कृषिमन्त्रालय विभाजन गरी छुट्टै सहकारी गरिबी निवारण मन्त्रालय गठन गरेपछि रजिस्ट्रार नियुक्ति प्रक्रिया झन् अन्योलमा परेको हो ।
“मन्त्रालयले नै पूर्णरूपमा काम सुरु गरेको छैन,” विभागका एक अधिकृतले भने, “रजिस्ट्रारको नियुक्ति त कहिले हो कहिले अन्योलमा छ ।”
रजिस्ट्रार रिक्त हुँदा ठूला सहकारीको सघन अनुगमन तथा अनुदान वितरणको काम पनि प्रभावित भएको छ । नेपाल राष्ट्र बैंक र विभागका कर्मचारीको संयुक्त टोलीले गरिरहेको सघन अनुगमनसमेत रजिस्टार नहँुदा सुस्ताएको ती अधिकृतले बताए ।
निमित्त रजिस्ट्रार ढुंगानाले भने अनुगमनको नियमित भइरहेको दाबी गरे । सघन अनुगमन नियमित काम भएकाले रजिस्ट्रार नहुँदा यसमा प्रभाव नपर्ने उनले बताए ।
सरकारले चालू आर्थिक वर्षको बजेटको कार्यक्रमअनुसार सहकारीलाई अनुदान समेत वितरणको कामसमेत रजिस्ट्रार नहुँदा अघि बढेको छैन । अनुदानका लागि विभागमा करिब ४ सय सहकारीको आवेदन परे पनि स्वीकृत गर्न नसकिएको विभागले जनाएको छ ।
अनुदानका लागि दुईजना विज्ञबाट संस्था छनोट गर्नुपर्ने र रजिस्ट्रारले मात्र विज्ञ नियुक्त गर्न सक्ने व्यवस्था भएकाले अनुदान वितरणको काम अघि बढ्न नसकेको विभागका कर्मचारी बताउँछन् । अनुदान वितरणको कार्यविधि भने सरकारले दुई साताअघि स्वीकृत गरेको थियो ।
यसैगरी विगत ८ महिनादेखि दर्ता प्रक्रियामा रहेको नेपाल बहुद्देश्यीय सहकारी केन्द्रीय संघ दर्ता प्रक्रिया पनि अन्योलमा परेको छ । केन्द्रीय संघ दर्ताको विवादकै कारण तत्कालीन रजिस्ट्रार ढकाल सरुवा भएका थिए ।
सहकारी ऐनले संघ संस्थाको दर्ता, प्रवद्र्वन, अनुगमन, कारबाही तथा खारेजीसम्मको अधिकार विभागलाई दिएको छ । विभागमा करिब २४ हजार सहकारी संघसंस्था दर्ता छन् । त्यसमध्ये आधा सहकारीले वित्तीय कारोबार गर्ने र तिनीहरूमा करिब २ खर्ब रुपैयाँ निक्षेप रहेको विभागको तथ्यांक छ ।
३० लाखभन्दा बढी सर्वसाधारण आवद्व रहेको सहकारीले बचत तथा ऋणका साथै कृषि, दुग्ध, मौरीपालन, जडिबुटी, उपभोक्ता पसल, यातायातलगायतका क्षेत्रमा काम गरिरहेका छन् । तर सहकारी विभागको क्षमता कमजोर हुँदा सहकारीमा बिकृति बढ्दै गएको तथा सहकारीमा रहेको सर्वसाधारणको निक्षेपसमेत जोखिममा रहेको विभिन्न सरकारी अध्ययनले समेत देखाएको छ ।
No comments:
Post a Comment